Mwamuzi wa kati, Jonesia Rukyaa ameteuliwa kuchezesha pambano la watani wa jadi, Januari 4, 2020 kati ya Simba dhidi ya Yanga, Uwanja wa Taifa.
Katika mchezo huo mwamuzi Jonesia kutoka Kagera atasaidiwa na msaidizi namba moja, Sudi Lila huku namba mbili akiwa, Hamisi Chang'walu wote wa jijini Dar es Salaam.
Kwa mujibu wa TFF, mwamuzi wa akiba ni Elly Sasii wa Dar es Salaam huku Kamishna wa mchezo huo akiwa Khalid Bitebo wa kutoka Mwanza na Mtathimini waamuzi ni Sudi Abdi ambaye anatokea Arusha.
Kigezo cha kwanza Jonesia ni mwamuzi wa Kimataifa mwenye Beji ya Shirikisho la Soka la Kimataifa (Fifa), pili ni amefanya vizuri kwenye mitihani na mazoezi ya utimamu kupima ubora na ufanisi wa marefa na tatu ameteuliwa kuchezesha fainali za dunia za wanawake na Afcon kwa Vijana 2019.
Jonesia ambaye atachezesha pambano la Simba na Yanga, mwishoni mwa mwaka juzi, alichezesha fainali za mataifa ya Afrika (Afcon) kwa wanawake zilizofanyika nchini Ghana kuanzia Novemba 17 hadi Desemba mosi.
Mwamuzi Jonesia anaingia kuchezesha mchezo wake wanne wa mechi ya watani huku akiwa na rekodi kutoa kadi nyekundu kwa michezo miwili aliyochezesha awali.
Hivyo wachezaji wa Simba na Yanga watalazimika kucheza kwa nidhamu ya hali ya juu ili kukwepa kadi nyekundu za mwamuzi Jonesia Rukyaa
Mhanga wa kwanza alikuwa nahodha wa Yanga, Kelvin Yondani ambaye katika mechi ya Mtani Jembe alilimwa kadi nyekundu kwa kumchezea madhambi Ramadhani Singano 'Messi'.
Pia alipochezesha mara ya pili kwenye Ligi Kuu mwaka 2016, aliyekuwa beki Abdi Banda wa Simba alionyeshwa kadi nyekundu kwa kumchezea madhambi Donald Ngoma.
