Kocha Mkuu wa Simba Sven Vandenbroeck amesema ushindi wa mabao 2-0 waliopata dhidi ya KMC jana ni matokeo ya wachezaji wake kujituma pamoja na kutekeleza maelekezo wallyopewa wakati wa mapumziko
Kwenye mchezo huo uliopigwa uwanja wa Uhuru, Simba ilifunga mabao yake yote mawili kwenye kipindi cha pili kupitia kwa Deo Kanda na Gerson Fraga
"Kipindi cha kwanza hatukucheza vizuri lakini kila mmoja ameona jinsi tulivyorejea tukiwa bora katika kipindi cha pili," Vandenbroeck aliwaambia waandishi wa habari baada ya mchezo huo
"Wakati wa mapumziko tuliwaelekeza wachezaji kuwa tulihitaji zaidi ya kile walichofanya kwenye kipindi cha kwanza, tulihitaji kutengeneza nafasi na muhimu zaidi ni kuzitumia"
"Kwangu mimi mlinda lango wa KMC (Nihimana) alikuwa nyota wa mchezo kwani kama sio umahiri wake tungeweza kushinda kwa mabao mengi zaidi"
Vandenbroeck ameeleza kushangazwa na nafasi wanayoshika KMC, kwani ni timu nzuri
"Nashangazwa na alama ambazo timu hii imekusanya, wanaonekana ni timu nzuri, nadhani walistahili kuwa katika nafasi zuri zaidi kwenye msimamo"
Ushindi huo uliendelea kuikita Simba kileleni mwa msimamo wa ligi baada ya kufikisha alama 31, alama saba zaidi ya Kagera Sugar inayoshika nafasi ya pili
