Mkufunzi wa klabu ya Simba Sven Vandenbroeck amesema hamasa ya mchezo wa watani wa jadi nchini anaweza kufananisha na mechi kubwa za wapinzani barani Ulaya zinazohusisha timu za Italia (AC Milan na Inter Milan) na hata Hispania (Real Madrid na Fc Barcelona)
Sven aliyetua Simba mapema mwezi huu kuchukua nafasi ya Patrick Aussems aliyetimuliwa, alipata nafasi ya kufuatilia mchezo kati ya Simba na Yanga wakati akiwa kocha mkuu wa timu ya Taifa ya Zambia
"Wakati nikiwa kocha wa Zambia nilifahamu ukubwa wa mchezo huu, nilikuwa nikimfuatilia Chama (Clatous) ambaye alikuwa mmoja wa wachezaji katika kikosi changu," alisema
"Ukubwa wa mchezo huu hauna tofauti na mechi nyingine kubwa za wapinzani barani Ulaya. Hapa mashabiki wanazipenda sana timu zao, ni mchezo ambao matokeo yake huamsha furaha upande mmoja na kusababisha majonzi makubwa upande mwingine"
"Ni aina ya mchezo ambao kila mchezaji ana ndoto ya kushiriki"
Simba inatarajiwa kuwa mwenyeji wa mchezo dhidi ya Yanga ambao utapigwa Januari 04 2020 katika uwanja wa Taifa
Huo utakuwa mchezo wa kufungua mwaka 2020 lakini pia utakuwa mchezo wa kwanza wa dabi kwa Sven ambaye ameanza vyema majukumu yake kunako klabu ya Simba
Chini yake Simba imeshinda mechi zote mbili walizocheza huku wakifunga mabao 10 bila ya kuruhusu bao hata moja
