Mwenyekiti wa zamani wa klabu ya Simba Ismail Aden Rage amesema kikosi cha mabingwa hao wa Tanzania Bara kiko imara na hakitishwi na mbwembwe za usajili zinazofanywa na Yanga
Akizungumza kuelekea mchezo baina ya timu hizo ambao utapigwa Januari 04 2020, Rage amesema itakuwa vyema kama TFF itawaruhusu Yanga wawatumie wachezaji wao wote waliowasajili dirisha dogo ili wasiwe na visingizio
Amesema kwa uimara wa Simba, pengine itawachukua Yanga karne moja kuweza kupata ushindi dhidi ya mabingwa hao wa nchi
"Mimi nawaonea Yanga huruma, labda nichukue wito huu kuwaomba TFF kama kuna wachezaji wa Yanga ambao usajili wao haujakamilika, sisi hatutaki wapate kisingizio. Namuomba Rais Karia na Kamati zake wawaruhusu hao wachezaji wao wote," alitamba Rage
"Simba imekuwa imara zaidi wakati huu wa kocha mpya pengine kuliko hata enzi za Aussems"
"Aussems alikuwa mzuri katika mchezo wa pasi na kumiliki mpira lakini huyu mpya amekuja na mbinu za kufunga mabao ndio maana mechi zake mbili tu Simba imefunga mabao 10"
"Wakipata bahati siku ya tarehe nne, kama hatukuwafunga saba, sijui itakuwaje. Nawaomba sana wapenzi wa Yanga ambao wana matatizo ya kiafya kama presha wasije uwanjani siku hiyo"
Zimebaki takribani siku nane kuelekea mchezo huo unaosubiriwa kwa hamu na mashabiki wa soka nchini
