Nitarejesha makali yangu - Niyonzima

Kiungo wa Simba, Haruna Niyonzima, amewataka mashabiki wa timu hiyo kutokuwa na hofu na uwezo wake na atarudi kwenye kiwango chake baada ya kupona majeraha ya kifundo cha mguu yanayomkabili.

Niyonzima yupo nje ya uwanja akiuguza majeraha hayo na ameachwa kwenye kikosi cha timu hiyo kinachoshiriki michuano ya Kombe la Mapinduzi inayoendelea visiwani Zanzibar.

Katika mahojiano na gazeti la Nipashe, Niyonzima, amesema anaumia kukaa nje na kushindwa kuitumikia timu yake, lakini hana namna lazima ahakikishe amepona majeraha yake.

“Mashabiki wanivumilie nipone, nitarejea uwanjani hivi karibuni, kwa kweli ninaumia kuwa nje, lakini sina namna,” alisema Niyonzoma.

Alisema kwa sasa anaendelea vizuri na atajiunga na wenzake kwenye maandalizi ya michezo ya Ligi Kuu.Kocha Masoud Djuma, amemwacha Niyonzima kwenye kikosi cha Simba alichoenda nacho Zanzibar, ili kumpa fursa ya kupona kabisa majeraha yake.

Simba inayodhaminiwa na Kampuni ya Kubashiri Matokeo Michezoni ya SportPesa, juzi ililazimishwa sare ya bao 1-1 na Mwenge FC ya Pemba kwenye mechi ya ufunguzi ya Kombe la Mapinduzi. Jana ikaichapa Jamhuri mabao 3-1.

Ikimaliza michuano hiyo ina kibarua kigumu cha mchezo wa Ligi Kuu dhidi ya Singida United.

Katika michuano hiyo Simba ipo Kundi A pamoja na URA, Jamhuri, Mwenge na Azam FC, wakati watani zao, Yanga wakiwa Kundi B ambalo linajumuisha timu ya Zimamoto, Mlandege, JKU, Taifa Jang’ombena Singida United.