Uongozi wa klabu ya Simba umetangaza kumfuta kazi aliyekuwa kocha wake Mkuu Patrick Aussems kuanzia leo Jumamosi, Novemba 30 2019
Taarifa iliyotolewa na Simba imeeleza uamuzi huo umechukuliwa baada ya Aussems kushindwa kutekeleza majukumu yake kwa viwango na malengo ambayo klabu ya Simba ilikubaliana nae katika mkataba wake
Miongoni mwa makubaliano hayo ni kuifikisha Simba hatua ya makundi michuano ya ligi ya mabingwa barani Afrika
Aidha taarifa hiyo imesema Aussems alipewa nafasi ya kujitetea kwenye kikao cha Kamati ya nidhamu ambako alikuwa akikabiliwa na tuhuma za kuondoka kituo cha kazi bila ya ruhusa ya uongozi
Utetezi wake haukutosheleza ikiwa ni pamoja na kukataa kutoa taarifa ya wapi alikokuwa ameenda
Taarifa hiyo imesema mchakato wa kumtafuta Kocha Mkuu umeanza mara moja ambapo kwa sasa kocha Msaidizi Denis Kitambi ameteuliwa kukaimu nafasi hiyo mpaka pale mchakato wa kumpata kocha utakapokamilika
