Pamoja na kuwepo kwa mgawanyiko baina ya mashabiki wa Simba kuhusu kocha wao Patrick Aussems ambaye amesimamishwa akisubiri hatma yake, yanayomtokea Aussems yana sababu
Kwa haraka haraka, kwa shabiki yeyote atashangaa kwa haya yanayoendelea baina ya uongozi wa Simba na Aussems
Pamoja na kuwa msimu huu hakufikia malengo kwenye michuano ya ligi ya mabingwa, heshima aliyojijengea msimu uliopita kwa kuipeleka Simba robo fainali ya michuano hiyo, ilitosha kumfanya aendelee kuaminiwa
Aidha hata msimu huu Simba haikufanya vibaya kwenye ligi. Chini ya Aussems Simba imefungwa mchezo mmoja tu na kutoka sare mchezo mmoja. Inaongoza ligi ikiwa imejikusanyia alama 25
Matokeo haya hayawezi kuwa sababu ya Aussems kuwekwa kikaangoni na mabosi wake
Tatizo liko hapa
Hivi karibuni Aussems aliondoka kwenda 'kusikojulikana' kushughulikia matatizo yake binafsi
Safari yake hiyo iliibua utata kwani Mtendaji wa Simba Senzo Mazingisa alibainisha kuwa hakuaga, alitoa taarifa akiwa uwanja wa Ndege
Hapa kuna shida, kwa nini hakuomba ruhusa? Ukiwa mwajiriwa sidhani kama Mwajiri wako atakuchekea ukiondoka eneo la kazi bila ya kuomba ruhusa hata kama ulipiga simu baada ya kuondoka
Kumekuwa na tetesi kuwa Aussems alikwenda kufanya mazungumzo na moja ya timu nchini Afrika Kusini (Polokwane City)
Mtendaji wa Simba Senzo ni mtu wa Afrika Kusini bila shaka alipatiwa taarifa zisizo na shaka na wenzake huko Afrika Kusini
Kitendo alichofanya Aussems ni kukiuka makubaliano yake na Simba
Kwani amekwenda kufanya mazungumzo na timu nyingine wakati akiwa ndani ya mkataba na Simba
Leo hii Simba ikiamua kuvunja mkataba wake hataambulia hata senti tano kwa kuwa tayari amekiuka makubaliano
Lakini pia kumekuwa na tuhuma nyingi za kinidhamu kwa wachezaji ambazo Aussems amekuwa akizifumbia macho
Kuna wachezaji ambao inaelezwa aliwapa Uhuru zaidi ya wengine. Wakati mwingine walikosa mazoezi lakini aliwapanga kwenye mechi
Hali hiyo ilichangia kushusha morali miongoni mwa wachezaji
Yeye mwenyewe pia hakuwa akifuata taratibu za ajira. Inaelezwa kuna wakati alikwenda kutembelea mbuga za Wanyawa akiiacha timu mikononi mwa kocha msaidizi kwa zaidi ya siku nne
Haya ni baadhi ya matukio ambayo pengine uongozi wa Simba ulivumilia lakini umeona wanapaswa kuchukua hatua
Ili ufanikiwe katika kazi yoyote suala la nidhamu inafaa liwe kipaumbele cha kwanza
Kama Aussems atanusurika kupoteza ajira yake, hakuna shaka atakuwa mfano kwa wengine katika kudumisha nidhamu
