Ni ukweli usiopingika kuwa kiungo Clatous Chotta Chama 'Triple C' au maarufu mwamba wa Lusaka msimu huu hajafikia hata nusu ya kiwango alichokuwa nacho msimu uliopitwa wakati alipojiunga na Simba
Mwanzoni mwa msimu Simba ilimuongeza Chama mkataba wa muda mrefu baada ya kuridhishwa na kazi aliyofanya msimu uliopita
Hata hivyo tangu kuanza kwa msimu huu, Wanamsimbazi bado hawajamuona Chama yule wanaemfahamu
Kumekuwa na mijadala kumuhusu kiungo huyo ambapo wengi wanaamini baada ya kuzoea nchini, Chama ametekwa na starehe za jiji la Dar es salaam
Inaelezwa Chama ni miongoni mwa wachezaji waliomuingiza matatani kocha Patrick Aussems kwani alimpa Mzambia huyo uhuru wa kuishi anavyotaka hali iliyopelekea akasahau misingi ya kazi iliyomleta Simba
Kutokana na kuwa tayari ameshafikishwa mbele ya Kamati ya Nidhamu kwa matukio ya utovu wa Nidhamu, uongozi wa klabu ya Simba unamfuatilia kwa karibu kiungo huyo wa Kimataifa wa Zambia
Yeye pamoja na Jonas Mkude wamekuwa wachezaji wanaozungumzwa sana kwa kukiuka misingi ya kazi yao huku ikidaiwa kuwa Aussems alikuwa 'akiwabembeleza' kabla ya Mtendaji Mkuu Senzo Mazingisa kuingilia kati
Kama watakumbwa na matukio zaidi ya utovu wa nidhamu wanaweza kuingia kwenye matata na uongozi wa Simba ambao chini Mazingisa umeonyesha mwelekeo tofauti hasa linapokuja suala la nidhamu ya wachezaji na wafanyakazi wengine wa klabu hiyo
