Uwanja wa Simba waongeza fursa Bunju

Idadi kubwa ya watu wameendelea kutembelea uwanja wa klabu ya Simba ulioko Bunju nje kidogo ya jiji la Dar es salaam

Wengi hasa mashabiki wa Simba wamekuwa na shauku ya kuona uwanja huo ambao uko katika hatua za mwisho kukamilika

Hapo Bunju Simba itakuwa na viwanja viwili, kimoja cha nyasi asili na kingine cha nyasi bandia

Kile cha nyasi asili tayari kimekamilika, sasa mafundi wanakamilisha zoezi la kutandika nyasi bandia katika kiwanja cha pili

Mashabiki kutoka maeneo mbalimbali wamekuwa wakifika uwanjani hapo kupiga picha ya kushuhudia kinachoendelea

Imekuwa fursa kwa vijana wa Bodaboda ambao wameshukuru neema hiyo iliyoletwa Bunju na klabu ya Simba

Fursa zaidi zitapatikana pale Simba itakapoanza rasmi kufanya mazoezi kwenye uwanja huo mwezi ujao

Tayari baadhi ya wafanyabishara wamepeleka maombi kwa uongozi wa Simba wakiomba wapatiwe maeneo ya kuweka biashara

Hafla ya uzinduzi wa uwanja huo itafanyika Disemba 08 ambapo uongozi wa klabu ya Simba umeahidi kumualika Rais wa Jamhuri ya Muungano wa Tanzania Dk John Magufuli kuzindua viwanja hivyo