Mabingwa wa soka Tanzania Bara Simba leo wamekata ngebe za Ruvu Shooting baada ya kuwafumua mabao 3-0 katika mchezo wa ligi kuu uliopigwa uwanja wa Uhuru
Ruvu Shooting walionekana kukamia mchezo huo hata hivyo ni Simba iliyokuwa bora zaidi, ushindi huo mnono umedhihirisha umwamba wao dhidi ya maafande hao wa Ruvu
Ilikuwa siku nzuri kwa mshambuliaji Miraji Athumani 'Sheva' ambaye ameendeleza ubora wake katika kuzifumania nyavu msimu huu
Miraji alipachika mabao mawili katika dakika za 40 na 75 huku bao la jingine likiwekwa kimiani na beki raia wa Brazil Tairone Da Silva ambaye aliujaza kimiani mpira wa kona uliochongwa na Francis Kahata
Ushindi ndio matokeo ambayo Simba ilihitaji, na sasa wamerejea kileleni mwa msimamo wa ligi baada ya kufikisha alama 25
Aidha, Miraji ameendelea kujiimarisha katika mbio za kuwania kiatu cha dhahabu sasa akifikisha mabao sita, akimkaribia kinara Meddie Kagere ambaye amefunga mabao 8
