Kocha Mkuu wa Simba Patrick Aussems ameeleza kushangazwa na baadhi ya mashabiki kukosa imani nae licha ya kuwa timu haina matokeo mabaya
Mbelgiji huyo amesema pamoja na changamoto kadhaa ambazo kikosi chake kinapitia lakini anaamini ana kikosi imara ambacho kitafanya vizuri msimu huu
"Lazima ukutane na changamoto katika mahala popote ambapo unafanya kazi na hilo nadhani ndio lipo wakati huu, lakini kama haitoshi kila kocha anaajiriwa ili afukuzwe kwa maana hiyo sina hofu yoyote na ninaendelea na majukumu yangu," Aussems amenukuliwa na gazeti la Mwanaspoti
"Hata kama itatokea kutimuliwa, sitakuwa wa kwanza kwa vile katika soka hakuna kocha wa kudumu, ila bado naamini Simba haina sababu ya kuwa na presha kwa sasa, tuna kikosi imara nasi tunatekeleza majukumu yetu kwa ajili ya kuwapa furaha mashabiki"
Presha dhidi ya Aussems ilianza baada ya Simba kupoteza mchezo dhidi ya Mwadui Fc kwa kufungwa bao 1-0 mkoani Shinyanga
Kipigo hicho kilikumbusha machungu ya kuondoshwa hatua ya awali ya michuano ya ligi ya mabingwa dhidi ya UD Songo
Matokeo ya suluhu dhidi ya Tanzania Prisons na kipigo dhidi ya KMC kwenye mchezo wa kirafiki juzi, kimeongeza minon'gono kumuhusu kocha huyo ambaye msimu uliopita aliifikisha Simba robo fainali ya michuano ya ligi ya mabingwa
Aussems anaendelea kukiandaa kikosi chake kuelekea mchezo wa ligi kuu dhidi ya Ruvu Shooting ambao utapigwa Jumapili Novemba 24 kwenye uwanja wa Uhuru
Ni mchezo ambao Simba inahitaji kushinda ili kurudisha hali ya utulivu kwa mashabiki wake kwani matokeo tofauti na ushindi yanaweza kumuweka kwenye wakati mgumu Aussems
