Mtendaji Mkuu wa Simba, Senzo Mazingisa raia wa Afrika Kusini amefichua kuwa mikakati yake ni kuona timu hiyo inacheza hatua ya makundi ya Ligi ya Mabingwa Afrika katika kila msimu.
Mazingisa ambaye amefanya kazi na baadhi ya klabu kubwa za nchini Afrika Kusini ikiwemo Platnumz Stars iliyowahi kushiriki ligi kuu ya nchi hiyo maarufu kama PSL akiwa kama Meneja Mkuu.
Mbali ya Platnumz, Mazingisa aliiongoza Orlando Pirates kwa mafanikio katika kipindi cha mwaka 2011 hadi 2013
Mazingisa amesema mikakati aliyonayo ni kuiona Simba inacheza hatua makundi ya Ligi ya Mabingwa Afrika kila msimu kwa lengo la kuongeza kipato cha timu hiyo
"Mkakati wangu ni kwamba nataka kuona Simba chini yangu inacheza hatua ya makundi ya Ligi ya Mabingwa Afrika kwa kila msimu hilo ndiyo jambo kubwa ambalo naliona kwa sasa," Mazingiza alinukuliwa na gazeti la SportXtra
"Unajua hii michuano kufika katika hatua ya makundi inakuwa ni jambo zuri kwa sababu kipato cha timu kinakuwa kinaongezeka, tumepoteza msimu huu ni sawa na kusema ni hasara kwetu lakini tunapoendea nataka kuona kila msimu tunacheza makundi"
Baada ya kucheza hatua ya robo fainali msimu uliopita, msimu huu mambo hayakuwa mazuri kwani mabingwa hao wa Tanzania Bara waliondoshwa hatua ya awali
Ili kujihakikishia kushiriki michuano hiyo msimu ujao, Simba inapaswa kutetea ubingwa wake walioutwaa kwa misimu miwili mfululizo
Mpaka sasa hesabu ziko salama kwani mabingwa hao wanaongoza ligi baada ya kushuka dimbani mara tisa, wamejikusanyia alama 22
