Mshambuliaji wa Simba Deo Kanda ameeleza kufurahia maisha ndani ya kikosi hicho kilichomsajili kutoka klabu ya TP Mazembe
Kanda alitua Simba mwanzoni mwa msimu kwa mkopo wa msimu mmoja akitoka Mazembe
Mshambuliaji huyo mkongwe, katika mchezo dhidi ya Mbeya City alifunga bao lake la kwanza msimu huu akiisaidia Simba kuondoka na ushindi wa mabao 4-0
Amesema tayari ameanza kuzoea mazingira ya Tanzania jambo ambalo litamsaidia kufanya vizuri zaidi
"Maisha ni mazuri na siku zinavyokwenda ndivyo nazoea mazingira ya Tanzania. Jambo hili linazidi kuniongezea ufanisi katika kutimiza wajibu wangu," amesema
Aidha mshambuliaji huyo wa zamani wa timu ya Taifa ya DR Congo, amesema ligi ya Tanzania ina ushindani, timu ndogo zinaonyesha ushindani mkali
"Nimejifunza timu za hapa zina ushindani hakuna kubwa wala ndogo, jambo kubwa ni kupambana na kufanya kazi ili kuwapa furaha mashabiki"
Kutokana na upana wa kikosi cha Simba, kocha Patrick Aussems amekuwa akimpa Kanda nafasi kulingana na mahitaji ya mchezo
Uwepo wa nyota kama Ibrahim Ajib, Francis Kahata na Miraji Athumani umepelekea asiwe na nafasi ya kudumu kwenye kikosi cha kwanza
