Pamoja na kupoteza alama tano katika mechi tatu zilizopita, kiungo fundi wa Simba Ibrahim Ajib amesema kwa ubora wa kikosi chao, watafanya vizuri na hata kutetea ubingwa kwa msimu wa tatu
Baada ya kupoteza mchezo dhidi ya Mwadui Fc kwa kufungwa bao 1-0, Simba ilimaliza hasira zake kwa kuifumua Mbeya City mabao 4-0
Jana ikapunguzwa kasi baada ya kulazimishwa suluhu ya bila kufungana na Tanzania Prisons hivyo kuambulia alama nne kutoka michezo mitatu ya mwisho
Lakini mwenendo huo haumpi wasiwasi Ajib ambaye jana alikuwemo kwenye kikosi kilichoikabili Prisons
"Sare ni matokeo ya mchezo, tulijipanga kupata ushindi lakini matokeo yamekuwa tofauti. Lakini hatukati tamaa bado kuna michezo mingi, naamini tutafanya vizuri," amesema
Msimu uliopita wakati akiitumikia Yanga, Ajib ndiye aliyekuwa kinara wa kutengeneza mabao ambapo alimaliza msimu akiwa ametoa pasi 17 za mabao huku mwenyewe akifunga mabao saba
Hali imekuwa tofauti tangu alipotua Simba, mpaka sasa ametoa pasi tatu za mabao huku akiwa bado hajazifumania nyavu
Ajib amefafanua kuwa pamoja na ushindani wa namba, mbinu zinazotumiwa na kocha Patrick Aussems ni tofauti na mbinu alizokuwa akitumia Zahera wakati yuko Yanga
"Wakati tupo Yanga tulikuwa tukitumia mipira mirefu zaidi, ndio maana hata mabao mengi ambayo tulikuwa tukifunga yalitokana na pasi ndefu"
"Lakini hapa Simba ni tofauti, tunacheza pasi fupi fupi na tunatengeneza nafasi kupitia mfumo huo. Namini nitaweza kufanya vizuri pia, kikubwa nitaendelea kujituma ili kocha azidi kuniamini na kunipa nafasi ya kucheza mara kwa mara"
