Kiungo mkabaji Gerson Fraga ni kama amewanyamazisha wale waliokuwa wakitabiri kuwa yeye pamoja na Wabrazil wenzie wawili hawatafanikiwa kwenye soka la Tanzania kutokana utofauti wa mazingira ya soka la nchini na huko kwao Brazil
Lakini Fraga amezoea haraka sana mazingira ya soka la Tanzania kuliko wenzie Tairone Da Silva na Wilker
Ni kiungo asiye na mambo mengi uwanjani lakini, amekuwa akifanya kazi yake ya ukabaji vyema huku akigawa mipira bila ya kuchelewa
Aina ya mchezo alioonyesha jana dhidi ya Azam Fc ambao Simba iliibuka na ushindi wa bao 1-0, inadhihirisha kuwa Fraga anaweza kucheza mechi ya aina yoyote, iwe fujo au tulivu
Mchezo dhidi ya Azam Fc ulijaa ubabe na matumizi ya nguvu na akili
Hata wakati Simba ilipokwenda kucheza mechi za kirafiki mkoani Kigoma, Fraga aliwashangaza mashabiki kwani alimudu kucheza kwenye uwanja wa Lake Tanganyika
Wapo walioujiuliza na kushangaa kuwa kweli Fraga ni raia wa Brazili?
Pamoja na kuwa raia wa Brazil, sehemu kubwa ya soka lake Fraga amelicheza nje ya Brazil
Pengine hiyo inaweza kuwa sababu ya yeye kwendana haraka na aina ya soka la Tanzania na Afrika kwa ujumla
