Mshambuliaji hatari wa Simba Meddie Kagere amewataka mashabiki wa timu hiyo kujitokeza kwa wingi leo kwenye mchezo wa ligi kuu dhidi ya Azam Fc ambao utapigwa uwanja wa Taifa kuanzia saa 11 jioni
Kagere ameanza msimu kwa 'moto' wa mabao mpaka sasa akiwa amefunga mabao sita baada ya kushuka dimbani mara nne, amesema leo uwanja wa Taifa kutakuwa na burudani ya kutosha kwa ajili ya mashabiki
"Tumejiandaa vizuri, muhimu tunaomba mashabiki wote waje kwa wingi uwanja wa Taifa watuunge mkono. Tunajua hautakuwa mchezo rahisi lakini tunajiamini na tutaweza kuondoka na matokeo mazuri," amesema
Naye Mkufunzi wa Simba Patrick Aussems amefurahia ongezeko la wachezaji waliokuwa timu ya Taifa akiamini watakuwa na mchango mkubwa kwenye mchezo wa leo
"Ukiondoa Kapombe ambaye hawezi kucheza kwa kuwa ni mgonjwa, wachezaji wengine wako katika hali nzuri kuelekea mchezo wetu dhidi ya Azam," amesema
"Najua hautakuwa mchezo mwepesi kwani Azam ni moja ya timu bora nchini Tanzania kwa sasa. Wamecheza mechi tatu na kushinda zote kama ilivyokuwa kwetu kushinda mechi zote nne"
"Utakuwa mtihani mzuri kwetu lakini tuko tayari, tunawaambia mashabiki waje kwa wingi uwanjani wapate burudani"
