Pamoja ya kuwa ni mchezo wa kirafiki, mechi kati ya Simba dhidi ya Bandari Fc itakayopigwa Jumamosi Oktoba 12 kwenye uwanja wa Taifa inatarajiwa kuwa na upinzani mkali
Mapema mwaka huu katika michuano ya Sportpesa Cup, Simba ilikutana na Bandari Fc hatua ya nusu fainali na kupoteza mchezo kwa kufungwa mabao 2-1
Simba ilitangulia kufunga bao lake kupitia kwa Meddie Kagere kabla ya Bandari kusawazisha na kufunga bao la pili
Bandari inashiriki michuano ya kombe la Shirikisho barani Afrika na inasubiri droo ya raundi ya mwisho kuelekea hatua ya makundi
Licha ya kuwakosa baadhi ya nyota wake walioitwa timu ya Taifa, kikosi cha Simba kiko imara na bila shaka kitawapa Burudani mashabiki wake Jumamosi
Wachezaji walioitwa timu ya Taifa ni Shomari Kapombe, Gadiel Michael, Mohammed Hussein, Erasto Nyoni, Jonas Mkude, Mzamiru Yassin na Miraji Athumani
Kocha Patrick Aussems amesema mchezo huo ni sehemu ya maandalizi ya kikosi chake kuelekea mchezo dhidi ya Azam Fc ambao utapigwa Oktoba 23 kwenye uwanja wa Uhuru
Kutokana na umbali wa mchezo huo, Aussems ametaka vijana wake wapate mechi za kirafiki ambazo zitawaweka katika hali ya ushindani
Simba imeanza vyema msimu wa ligi kuu ikifanikiwa kushinda mechi zote nne za kwanza, imejikita kileleni mwa msimamo ikiwa na alama 12
