Baada ya kufunga mabao 23 msimu uliopita, mshambuliaji hatari wa Simba Meddie Kagere anapiga hesabu ya kufunga kuanzia mabao 30 msimu huu
Mpaka sasa Kagere tayari ameshafunga mabao sita akiongoza mbio za kuwania kiatu cha dhahabu kwa msimu wa pili mfululizo mapema tu baada ya mechi nne
Kagere amefunga kwenye kila mchezo akiwa na wastani wa kufunga zaidi ya bao moja kila mechi
"Nafurahi tumeanza ligi vizuri, ushindi katika mechi zilizopita umetuongezea morali," amesema
"Mimi kama mshambuliaji kazi yangu kubwa ni kufunga ili kuhakikisha naisaidia timu kupata ushindi"
"Siwezi kusema nitafunga mabao mangapi lakini muhimu nitajitahidi kutumia nafasi ninazopata katika kila mchezo ili kufunga"
Kama Kagere ataendeleza wastani huo wa ufungaji ni wazi upo uwezekano atafunga mabao zaidi ya 30
Aidha mshambuliaji huyo yuko katika nafasi ya kuvunja rekodi ya mabao ligi kuu ya Tanzania Bara ambayo inashiliwa na Mohammed Hussein 'Mmachinga' aliyewahi kufunga mabao 26 kwenye msimu mmoja
