Kocha Mkuu wa Simba Patrick Aussems anaendelea kukiandaa kikosi chake tayari kwa mchezo wa ligi kuu dhidi ya Kagera Sugar
Mchezo huo utapigwa keshokutwa Alhamisi kwenye uwanja wa Kaitaba
Katika mazoezi ya mabingwa hao wa nchi yanayofanyika uwanja wa Gymkhana, Aussems ameonekana kuwapa maelekezo wachezaji wake kuhakikisha wanapata mabao ya mapema
Msimu huu Aussems ameonekana kuweka mkazo katika kupatikana kwa mabao mapema
Katika mchezo wa kwanza dhidi ya JKT Tanzania Simba ilifunga bao kwenye dakika ya pili huku mchezo dhidi ya Mtibwa Sugar ikifunga bao kwenye dakika ya 16
Mbelgiji huyo amesema ni muhimu kwa vijana wake kuhakikisha wanafunga bao ndani ya dakika ya 20 za kwanza ili kuweza kuwaweka wapinzani wao kwenye presha
"Unapofunga bao mapema linawaweka wapinzani wako kwenye presha hivyo kunakuwa na uwezekano wao kufanya makosa zaidi," alisema
"Tunafahamu Kagera Sugar ni timu nzuri, msimu uliopita walitufunga michezo yote miwili. Tutacheza kwa tahadhari lakini malengo yetu ni kushinda mchezo huo"
