Beki wa Simba na Taifa Stars, Shomari Kapombe, sasa kimeeleweka baada ya kujumuishwa katika majina ya wachezaji yaliyopelekwa serikalini kwa lengo la kupatiwa viwanja vilivyotolewa na Rais wa Jamhuri ya Muungano wa Tanzania, John Magufuli.
Rais Magufuli aliahidi kuwazawadia wachezaji hao viwanja jijini Dodoma, baada ya kufanikiwa kufuzu michuano ya Mataifa ya Afrika (Afcon 2019), zilizofanyika nchini Misri.
Kapombe hakuwa miongoni mwa wachezaji waliokwenda Ikulu, Dar es Salaam, kupongezwa na Rais Magufuli, baada ya kuifunga Uganda mabao 3-0 katika mchezo wa mwisho uliochezwa Machi 24, mwaka huu, kwenye Uwanja wa Taifa na kufuzu michuano hiyo.
Beki huyo alisahaulika katika zawadi ya Rais Magufuli kutokana na hakuwapo kwenye kikosi kilichocheza na Uganda, sababu alikuwa akiuguza jeraha aliloumia Afrika Kusini ambako Taifa Stars iliweka kambi ya kujiandaa na mchezo dhidi ya Lesotho.
Kutokana na beki huyo kuumia akiwa katika majukumu ya Taifa, alishindwa kuitumika Taifa Stars michezo miwili ya kuwania kufuzu Afcon dhidi ya Lesotho na Uganda, hivyo kutojumuishwa na wachezaji wenzake waliokwenda kupongewa na rais.
Hata hivyo, Shirikisho la Soka Tanzania (TFF), kupitia Ofisa Habari na Mawasiliano,Clifford Ndimbo, amesema Kapombe ni miongoni mwa wachezaji watakaopata zawadi ya viwanja vilivyotolewa na Rais Magufuli na jina lake limepelekwa serikalini.
Ndimbo alisema TFF kupitia kamati ya mashindano iliona imjumujisha kwa sababu ni miongoni mwa wachezaji waliopigana hadi Stars kufuzu kushiriki Afcon 2019, licha ya kukosa mchezo dhidi ya Uganda kutokana na kuuguza jeraha.
"Viwanja vilivyohaidiwa na Rais bado havijakabidhiwa kwa wachezaji kutokana na baadhi ya nyaraka kutokamilika.
"Hivi karibuni Mkuu wa Mkoa wa Dar es Salaam, Paul Makonda, aliitaka TFF kukamilisha nyaraka muhimu zinazoeleza mchango wa wachezaji katika kuifanikisha Stars kwenda Misri ili zikabidhiwe ofisini kwake na kuanza mchakato wa kuwapatia viwanja vyema hati miliki ya majina ya wachezaji akiwamo Kapombe," alisema Ndimbo.
