Kocha Msaidizi wa timu ya Taifa ya Tanzania 'Taifa Stars' Selemani Matola amesema winga Miraji Athumani atapata mafanikio baada ya kurejea Simba kwa mara ya pili
Matola ndiye aliyekuwa mkufunzi wa Lipuli Fc msimu uliopita, Miraji akiwa mmoja wa wachezaji wa kikosi chake
Matola pia aliwahi kuwa kocha wa Simba B akijivunia kuwaandaa nyota kadhaa wa Simba akiwemo Miraji, Ibrahim Ajib, Jonas Mkude, Said Khamis Ndemla na Mohammed Hussein
Matola amesema anamfahamu Miraji kama mchezaji anayependa kujituma na kupata mafanikio
"Miraji anajitambua na ni mtu ambaye anapenda mafanikio, kwa hiyo kutokana na kuwa na roho hiyo naamini kabisa kuwa, kasi aliyoanza nayo ndiyo hiyo atakayoendelea nayo kama ambavyo amekuwa akifanya siku zote," amesema Matola ambaye anamnoa winga huyo timu ya Taifa
Akizungumzia ushindani wa namba kwenye kikosi cha Simba, Matola amesema anaamini Miraji atapewa nafasi ya kocha Patrick Aussems kwani ni mchezaji mwenye uwezo
Miraji tayari amefunga mabao mawili msimu huu katika michezo ya ligi kuu ya Vodacom dhidi ya JKT Tanzania na Mtibwa Sugar
