Kikosi cha timu ya Taifa ya Tanzania 'Taifa Stars' kinatarajiwa kuingia kambini leo kujiwinda na mchezo wa kwanza wa kuwania kufuzu hatua ya makundi kusaka tiketi ya kutinga fainali za kombe la dunia mwaka 2022
Stars itasafiri kwenda nchini Burundi ambapo Septemba 04 itacheza mechi ya kwanza na kisha timu hizo kurudiana jijini Dar es salaam Septemba 08
Akizungumza na waandishi wa habari jana, Katibu Mkuu wa Shirikisho la Soka Tanzania (TFF), Wilfred Kidau, alisema maandalizi kwa ajili ya mchezo huo yanaendelea vizuri wakishirikiana na serikali kuhakikisha Taifa Stars inaifunga Burundi.
Aidha, alisema kwa upande wa wachezaji wanaocheza soka la kulipwa nje ya nchi tayari wamewatumia tiketi zao ili kuja kujiunga na wenzao lengo likiwa ni kuhakikisha wanashinda mechi hiyo na kusonga mbele.
Klabu ya Simba imetoa nyota saba kwenye kikosi cha timu hiyo ambao watajiunga na wenzao baada ya mchezo wa kesho dhidi ya JKT Tanzania
Walioitwa Stars kutoka Simba ni Beno Kakolanya, Shomari Kapombe, Gadiel Michael, Mohammed Hussein, Erasto Nyoni, Jonas Mkude na Hassn Dilunga
