Baada ya kuondoshwa kwenye michuano ya ligi ya mabingwa, kikosi cha Simba kimebaki na michuano mikubwa miwili, kutetea ubingwa wa ligi kuu kwa msimu wa tatu mfululizo pamoja na michuano ya kombe la FA
Akizungumza na waandishi wa habari jana baada ya mchezo dhidi ya UD Songo ambao ulimalizika kwa sare ya bao 1-1, kocha Mkuu wa Simba Patrick Aussems alisema wataweka mkazo kwenye mashindano yote yaliyobaki
"Malengo yetu kwa sasa ni kufanya vizuri kwenye mashindano yote kuanzia Ligi Kuu, kombe la FA na mingine ambayo tutashiriki," alisema
Ujumbe huo wa Aussems unamaanisha yale masihara kwenye michuano ya kombe la FA hayatakuwepo
Kwa misimu miwili iliyopita, Simba haikuwekea uzito michuano hiyo ambayo bingwa wake anashiriki kombe la Shirikisho
Aidha msimu ujao inaweza kutokea nafasi nne za kimataifa kupunguzwa tena kama timu za Yanga na Azam Fc zitashindwa kufanya vizuri
Hivyo kwa Simba kuwekea mkazo mataji yote mawili ni uamuzi sahihi zaidi
