Simba imeondoshwa kwenye michuano ya ligi ya mabingwa baada ya kulazimishwa sare ya bao 1-1 dhidi ya UD Songo hapo jana
Matokeo hayo sio kwamba yamewaumiza mashabiki tu, bali yamewafanya wakikumbuke kikosi chao cha msimu uliopita
Mchezaji aliyekumbukwa sana ni Mganda Emmanuel Okwi aliyetimkia Misri
Uwepo wa Okwi kwenye kikosi cha Simba msimu uliopita ulimnufaisha sana Meddie Kagere kwani kazi ambayo anaifanya sasa ilikuwa ikifanywa na mganda huyo
Okwi ni msumbufu na anajua kulazimisha makosa kwa mabeki. Aina yake ya uchezaji ilimpa Kagere nafasi ya kuwa huru na kufunga kila mara
Aidha kukosekana kwa nahodha John Bocco ambaye ni majeruhi pia ilikuwa changamoto
Kiungo James Kotei ni mchezaji mwingine ambao wengi hawaamini uamuzi wa uongozi wa Simba kumuacha
Hata kocha Patrick Aussems aliwahi kulizungumza hili, kuwa hakupenda Okwi na Kotei waachwe
Kotei alikuwa akifanya kazi isiyoonekana Simba, alikuwa ni mlinzi wa safu ya ulinzi ya Simba
Kazi yake kubwa ilikuwa kufuta makosa ya safu ya ulinzi na wakati mwingine alidhibiti yasitokee
Kwa sasa Simba ina viungo wengi wazuri wa kushambulia lakini katika ulinzi hawako bora sana
Shiboub alianza vizuri sana, lakini baadae alishindwa kuonyesha makali yake pengine presha ya mchezo ilimfanya ashindwe kutamba. Aussems alilazimika kumtoa na nafasi yake kuchukuliwa na Miraji Athumani
Wengi wana matumaini makubwa kwa kiungo Mkenya Francis Kahata lakini nae siku ya jana mchezo ulimkataa na Aussems kulazimika kumtoa baada ya dakika 40
Simba imetolewa kwenye michuano ya ligi ya mabingwa ambayo uongozi uliwekeza sana kufanya vizuri
Nguvu hii sasa ihamishiwe kwenye ligi na kombe la FA
Kwa kikosi kilichopo, Simba ina kila sababu ya kushinda makombe yote mawili
