Mlinda lango wa Simba Aishi Manula amesema hana shaka na uwezo wa Beno Kakolanya na amevutiwa na kiwango alichoonyesha jana kwenye mchezo dhidi ya Azam Fc
Manula ambaye kwa sasa bado yuko nje akiendelea na matibabu ya majeraha aliyopata wakati akiitumikia timu ya taifa, amesema Simba ilimsajili Kakolanya kwa kuwa walifahamu anao uwezo wa kucheza timu hiyo
"Siku zote huwa nikimuangalia Kakolanya namuona ni kipa mzuri sana, Simba ilimsajili kwa kuwa walimuona ana uwezo," amesema
Manula amesema kufanya vizuri kwa Kakolanya ni jambo zuri kwa klabu ya Simba kwani aliletwa ili kuisaidia timu hiyo kufikia malengo yake
"Nikiwa langoni mimi, Kakolanya au Salim ni sawa tu kwani sote lengo letu ni moja, kuhakikisha timu inapata ushindi na kufikia malengo yake"
Uimara unaoonyeshwa na Kakolanya wakati huu ambao Manula ni majeruhi, huenda ukampa changamoto baadae kwani Manula atalazimika kufanya kazi ya ziada kurejesha 'ufalme' wake
Hata hivyo ushindani huo utainufaisha zaidi Simba kwani wachezaji hao watafanya kazi mara dufu ili waendelee kuaminiwa
