Mabingwa wa soka Tanzania Bara Simba leo Jumamosi saa moja jioni watashuka uwanja wa Taifa kuikabili Azam Fc katika mchezo wa Ngao ya Jamii
Simba, mabingwa wa Ngao ya Jamii kwa misimu miwili mfululizo, watakuwa wakisaka rekodi ya kutwaa Ngao hiyo kwa msimu wa tatu
Kocha Mkuu wa Simba Patrick Aussems amesema mchezo huo unatarajiwa kuwa na ushindani mkali lakini amekiandaa kikosi chake vyema kuweza kutwaa taji la kwanza msimu huu
"Mchezo hautakuwa mwepesi, tunawaheshimu wapinzani wetu, tumewafuatilia wana timu nzuri. Mpango wetu ni kushinda ili tutwae taji la kwanza msimu huu," amesema
Kwenye mchezo huo, Simba itawakosa nyota wake watatu; Aishi Manula, Ibrahim Ajib na Wilker Da Silva ambao wameanza mazoezi juzi baada ya kupona majeraha
Wapinzani wao Azam Fc nao watawakosa wachezaji watatu Bruce Kangwa, Mudathir Yahya na Agrrey Moris wote wakiwa majeruhi
Huu utakuwa mchezo wa pili wa kimashindano kwa Simba msimu huu baada ya ule wa ligi ya mabingwa ambao ulipigwa Msumbiji
