Kocha Mkuu wa Simba Patrick Aussems amesisitiza kuwa wachezaji wake raia wa Brazil, wanahitaji muda zaidi ili kuweza kuwa na mchango kwenye kikosi chake
Wakati mshambuliaji Wilker Da Silva akiwa majeruhi, walinzi Gerson Fraga na Tairone Sontos hawakupata nafasi kwenye mchezo wa kwanza wa ligi ya mabingwa dhidi ya UD Songo uliopigwa Jumamosi iliyopita nchini Msumbiji
Aussems amesema hana wasiwasi na uwezo wa wachezaji hao lakini wanakabiliwa na changamoto ya kuzoea mazingira na utamaduni wa soka la Afrika
"Ni wachezaji wazuri lakini nadhani wanahitaji kuufahamu utamaduni wetu hapa na mazingira ya soka la Afrika kwa ujumla," amesema
"Kwa sasa tusitarajie mambo makuwa sana kutoka kwao"
Aidha Aussems amesema kwa ujumla kikosi chake kina wachezaji wageni asilimia 50 hivyo baadhi wanahitaji muda zaidi ili kuweza kwenda sambamba na wenzao waliowakuta
Jumamosi ya August 17 Simba itacheza na Azam Fc mchezo wa Ngao ya Jamii kisha kuikaribisha UD Songo kwenye dimba la Taifa August 25 kwenye mchezo wa pili wa ligi ya mabingwa
