Wingi wa mashabiki waliojitokeza kwenye Uwanja wa Taifa Dar es Salaam katika maadhimisho ya Simba Day umewafanya viongozi wa klabu hiyo kufikiria kufunga TV kubwa kwenye Uwanja wa Uhuru ili watakaokwama kuingia uwanjani wakashuhudie huko.
Ofisa Mtendaji Mkuu wa Simba, Crescentius Magori amesema kuna uwezekano mashabiki wakazidi idadi ya tiketi, hivyo watakaosalia watafungiwa TV uwanja wa Uhuru ili wakashuhudie kwa kiingilio kidogo.
Akionyesha ripoti ya mauzo ya Selcom ambayo hadi saa 8 Mchana ilionyesha tiketi 54,734 zikiwa zimeshanunuliwa huku uwanja wa Taifa ukiwa na uwezo wa kuchukua mashabiki 60,000.
"Zoezi la ununuaji wa tiketi linakwenda vizuri na itakapofika idadi ya mashabiki wanaojaza uwanja, tunaandaa utaratibu mwingine wale watakaokuwa hawana tiketi na wako nje ya uwanja wakashuhudie mechi uwanja wa uhuru ambako tutafunga skirini," alisema.
Alisema watakaoshuhudia kwenye uwanja wa Uhuru watalipa kiingilio cha Sh2000.
"Simba haibahatishi, hamasa ya mashabiki iliyojitokeza ni ishara tosha upande wa pili hawatuwezi, pamoja na kwamba leo ni siku ya kazi," alisema Magori.
