Mkuu wa Habari na Mawasiliano klabu ya Simba Haji Manara amesema leo ni siku nyingine kwa Wanasimba kuandika historia katika hafla ya kilele cha wiki ya Sportpesa Simba Week inayofanyika uwanja wa Taifa
Manara amesema anafahamu mashabiki wa Simba wanaipenda sana timu yao na ndio maana ni kawaida yao kujitokeza kwa wingi uwanja wa Taifa Simba inapofanya matukio muhimu
Akizungumza na waandishi wa habari jana, Manara alisema leo wanakwenda kuandika historia nyingine katika siku maalum ya utambulisho wa timu yao
"Tunajua kesho(leo) ni siku ya kazi lakini kwa Simba haijalishi, nakumbuka mara ya mwisho tulikuwa tunacheza na Al Ahly siku ya Jumanne kama ya kesho (leo) tena tulikuwa tumetoka kufungwa mechi mbili mfululizo kwa goli tano tano lakini bado wanasimba wakaujaza uwanja kiasi cha kuwashangaza Ahly," amesema
"Kwa hiyo naamini kwa kesho (leo) pamoja na kuwa ni siku ya kazi, utambulisho wa wachezaji wao wapya na shamrashamra ambazo tumeziandaa naamini watu 60,000 bila mapengo watakuwa pale uwanja wa Taifa full muziki."
Pamoja na burudani nyingine, Simba inatarajiwa kucheza mchezo wa kirafiki dhidi ya Power Dynamo ya Zambia
Mchezo huo utapigwa saa 11 na nusu jioni baada ya utambulisho wa kikosi cha Simba
