Manara ataka utulivu Simba

Mkuu wa Kitengo cha Habari Simba, Haji Manara anewataka mashabiki wasiingilie majukumu ya kocha, wampe nafasi kwa kocha afanye kazi yake kwa weledi.

Kufuatia matokeo ya sare ya mabao 2-2 dhidi ya Mbao FC, baadhi ya mashabiki wamekuwa wakishinikiza uongozi wa Simba ufanye mabadiliko kwenye benchi la ufundi.

Hata hivyo Manara amesisitiza ni vizuri kocha akaachwa huru kufanya kazi yake kwa kuwa yeye ndiye mwenye taarifa sahihi juu ya kila mchezaji na utayari wake wa kuitumikia Simba katika mechi husika.

"Unajua mashabiki wanapaswa kujifunza na ikiwezekana kuwa watulivu na kuiacha taalum ifanye kazi. Mfano suala la sub linaweza kuwa limewaudhi, lakini hawajawahi kwenda mazoezini," amesema.

"Walimu ndiyo wanajua nani anafanya vizuri, nani wakimtumia kwa wakati gani itakuwa sahihi na si mashabiki wanamshabikia nani"

"Lakini hiyo haitoshi, kila mmoja anakumbuka, sisi ndiyo tulikuwa tunaongoza kuwafukuza makocha na ikawa si kitu kizuri. Sasa hatuwezi kuwa kitu kidogo, kocha aondoke.

"Tunaweza kupata kocha mzuri kabisa na maarufu, lakini pia asipate matokeo tunayotaka. Hii nayo itaturudisha nyuma na kuongeza maneno tena, hivyo ni lazima kutafakari mambo na ikiwezekana kuangalia utatuzi sahihi wa tatizo. Kufukuza au kuajili si njia pekee ya kumaliza tatizo, ameongeza Manara

Simba iko mkoani Shinyanga ambapo Jumapili ijayo itakuwa ugenini kumenyana na Stand United.