Mabingwa wa soka Tanzania Bara Simba bado wako Afrika Kusini wakiendelea na maandalizi ya msimu mpya wa ligi kuu ya Tanzania Bara, ligi ya mabingwa pamoja na michuano mingine
Wakiwa huko Afrika Kusini, Simba tayari wamecheza michezo miwili ya kirafiki na kufanikiwa kushinda yote huku wakifunga mabao nane
Mchezo wa kwanza ulikuwa dhidi ya Orbit Tvet, Simba ikishinda mabao 4-0 kabla ya juzi kuifumua Platinum Stars mabao 4-1
Kesho mabingwa hao wa nchi, watachuana na mabingwa wenzao kutoka Botswana Township Rollers
Hawa Rollers ndio waliwaondoa Yanga kwenye michuano ya ligi ya mabingwa mapema mwaka jana kwa kuwachapa mabao 2-1 katika mchezo uliopigwa uwanja wa Taifa
Watakuja tena Tanzania mwaka huu kumenyana na Yanga katika hatua ya awali
Nao wameweka kambi yao ya maandalizi Afrika Kusini
Simba itakamilisha ratiba yake ya michezo ya kirafiki Julai 30 kwa kuumana na Orlando Pirates ambao msimu uliopita walimaliza katika nafasi ya pili ligi kuu ya Afrika Kusini
Pirates itashiriki michuano ya ligi ya mabingwa kama ilivyo kwa Simba
