Kocha Mkuu wa Simba Patrick Aussems anakabiliwa na changamoto ya kukiandaa kikosi chake bila ya wachezaji saba walioitwa kujiunga na kambi ya timu ya Taifa ya Tanzania 'Taifa Stars'
Stars iliingia kambini jana kuanza maandalizi ya mchezo wa kusaka tiketi ya kucheza fainali za michuano ya CHAN dhidi ya Kenya
Mchezo huo utapigwa kwenye uwanja wa Taifa Julai 28 na kisha timu hizo kurudiana August 04 nchini Kenya
Akizungumza baada ya CAF kutoa ratiba ya awali ya michuano ya ligi ya mabingwa, Aussems amesema anakabiliwa na changamoto hiyo kutokana na umuhimu wa wachezaji hao kuelekea mchezo wa kwanza dhidi ya UD Songo ambao utapigwa mapema tofauti na matarajio yao
"Ni pigo kwetu kwa sababu hatutakuwa na wachezaji saba mpaka August 07 siku mbili kabla ya kucheza na UD Songo," amesema
"Tunalazimika kufanya mabadiliko ya maandalizi yetu ili kuhakikisha tunakuwa tayari kwa mchezo huo"
Wachezaji wa Simba walioondoka Afrika Kusini kurejea nchini kuungana na kambi ya Stars ni Aishi Manula, Gadiel Michael, Erasto Nyoni, Jonas Mkude, Hassani Dilunga, Ibrahim Ajib na nahodha John Bocco
