Wiki iliyopita Mfanyabiashara Rostam Aziz ambaye ni Mwanachama wa Yanga alitoa maoni ya kuwa haungi mkono timu za soka zenye wanachama wengi kuendeshwa kwa kumilikiwa na mtu mmoja au kufadhiliwa
Rostam aliishauri timu yake ya Yanga kujiepusha na mfumo wa kumilikiwa na mtu mmoja huku akikosoa mfumo unaotumiwa na mabingwa wa Tanzania Bara, Simba
Wadau mbalimbali wamepinga maoni ya Bilionea huyo huku wengi wakimkosoa kuwa hafahamu masuala ya uendeshaji wa soka la kisasa
Miongoni mwa waliotoa maoni ni aliyekuwa Mkurugenzi wa Ufundi wa Shirikisho la Mpira wa Miguu nchini, Ammy Ninje
Ninje amesema Serikali imetambua umuhimu uwekezaji katika mpira wa miguu na ndio maana ikaunda Sheria kusimamia utaratibu huo
Ninje ameeleza kuwa kama serikali tayari imeshaweka utaratibu mzuri wa mgawanyo wa hisa kwa mwekezaji na wanachama hivyo ni vizuri ukafuatwa.
"Tunahitaji kubadilika ila tusikurupuke, tuwape timu wawekezaji ili tuone baada ya muda kama tutapiga hatua, kwa mfano Simba tayari wapo huko na mwekezaji ana asilimia 49, tumpe nafasi ya kufanya mabadiliko ili mwisho wa siku tuone tutafika wapi," amesema
Ammy Ninje ameongeza kuwa hata vilabu vikubwa vilivyofanikiwa barani Ulaya ni vya wanachama lakini vilihama kutoka kwenye mfumo huo na kwenda kwenye uwekezaji na ndio maana vina nguvu uwanjani na kiuchumi kiujumla.
