Simba ina kikosi kilichojaa nyota wengi hali iliyopelekea baadhi ya wachezaji kushindwa kupenya kwenye kikosi cha kwanza licha ya kuwa na ubora
Hapa unazungumzia wachezaji kama Adam Salamba, Said Ndemla, Mohammed Ibrahim 'Mo', Rashidi Juma na wengine ambao wamekuwa na nafasi finyu kwenye kikosi cha kwanza
Hivi karibuni Simba ilisajili nyota mwingine mzawa Miraji Athumani ambaye ataungana na wachezaji wengine wazawa waliosajiliwa kama Ibrahim Ajib, Kennedy Juma na Beno Kakolanya
Miraji aliyeanzia soka lake kwenye kikosi cha timu ya vijana ya Simba, amerejea akitokea klabu ya Lipuli Fc
Winga huyo aliyekuwa kwenye kikosi cha timu ya Taifa kabla ya kuachwa kwenye mchujo wa pili, ametua Simba baada ya usajili wake kupendekezwa na kocha Patrick Aussems
Miraji anatajwa kuchukua nafasi ya Shiza Kichuya aliyeuzwa nchini Misri
Miraji amesema anafahamu haitakuwa kazi rahisi kupenya kwenye kikosi cha kwanza cha Simba kutokana na ubora wa wachezaji wa timu hiyo lakini anaamini kama atajituma na kufuata maelekezo atakayopewa na benchi la ufundi atakuwa na nafasi
"Siwezi kukata tamaa imani yangu nakwenda kukutana na changamoto ambayo natakiwa kuikabili na kushinda ili niweze kutimiza malengo yangu ya kucheza," amesema
"Nafahamu wachezaji ambao wapo Simba ni wakubwa na wana uzoefu lakini nitakuwa namsikiliza kocha anataka nifanye nini katika na kufanya kazi"
"Narejea Simba kwa mara ya pili, mara ya kwanza nilionekana mdogo nilipandishwa kutoka timu ya vijana kwa maana hiyo ni mzoefu na nafahamu mambo mengi na hata ukubwa na presha ya timu naifahamu"
