Kiungo Clatous Chota Chama 'CCC' maarufu kama Mwamba wa Lusaka yuko kwao nchini Zambia akiendelea na mapumziko baada ya kumaliza msimu wake wa kwanza Simba kwa mafanikio makubwa
Licha ya kutokuwepo nchini, Chama amefichua kuwa anafuatilia kila kinachoendelea Msimbazi na amefurahishwa na maboresho ya kikosi cha Simba yanaofanywa na uongozi
Chama amesema malengo ya msimu ujao ni kupata mafanikio zaidi na anaamini hilo litawezekana kutokana na usajili unaofanywa na viongozi wa Simba
"Ninayo furaha kuwa sehemu ya kikosi cha Simba msimu uliopita na natarajia hata msimu ujao nitakuwapo lakini kinachovutia ni namna kikosi kinavyoboreshwa," Chama amenukuliwa na Mwanaspoti
"Kwa sasa nipo mapumzikoni, lakini nafuatilia kila kitu na ninaamini maboresho yanayofanyika Simba yataifanya iwe tishio zaidi kuliko msimu uliopita na huenda tukatetea tena taji na kutikisa Afrika"
Aidha Chama amesema hahofii mbwembwe za usajili zinazofanywa na watani zao Yanga kwani anaamini kikosi cha Simba ni imara zaidi na kitaendelea kuwa bora dhidi ya wapinzani wao
Hadi sasa Simba imekamilisha usajili wa nyota wanne wapya wakiwamo wawili wa kigeni ambao ni straika Wilker Henrique Da Silva kutoka Brazili na Msudan Shiboub Sharaf Eldin ambaye ni kiungo mshambuliaji.
Wengine ni kipa Beno Kakolanya na mshambuliaji Miraj Athuman walikuwa Yanga na Lipuli, huku nyota wao wa zamani aliyekuwa Yanga, Ibrahim Ajibu akitajwa naye keshasaini mkataba wa miaka miwili.
Zoezi la usajili huenda likakamilishwa mwishoni mwa wiki hii
