Kocha MKuu wa Simba, Patrick Aussems, amesema kwamba ndoto yake ya kuwa na nyota wa nje ya Bara la Afrika ndani ya kikosi chake, imetimia baada ya kutua kwa ‘kifaa’ kutoka Brazil, Wilker Henrique da Silva ambaye jana alisaini mkataba wa miaka miwili kuitumikia klabu hiyo.
Aussems amesema kuwa mchezaji huyo ni miongoni mwa nyota ambao aliwataka ndani ya kikosi chake na hivyo kuwaomba mabosi wa Simba kufanya kila wanaloweza kumsajili.
"Simba ni timu ambayo ipo kwenye kiwango cha juu kwa sasa katika klabu za Afrika Mashariki, nilitaka mchezaji wa nje ya Bara la Afrika ili kuboresha kikosi changu, ninaamini sasa itakuwa tishio zaidi," Aussems amenukuliwa na gazeti la Bingwa
Alisema mshambuliaji huyo ni moto wa kuotea mbali ambapo alikuwa akimfuatilia katika mechi za huko Brazil na kwamba alikuwa akifanya vizuri, hivyo anaamini kuwa hatamwangusha.
Mbelgiji huyo alisema inawezekana mashabiki wa Simba, walikuwa na hofu juu ya mbadala wa aliyekuwa mshambuliaji mkongwe wa timu hiyo, Emmanuel Okwi, akiwahakikishia Da Silva ni zaidi ya Mganda huyo.
Pamoja na kupata mafanikio makubwa msimu uliopita kwa kutetea ubingwa wao wa Ligi Kuu Tanzania Bara na kufika robo fainali ya Ligi ya Mabingwa Afrika, Simba imeonekana kujipanga vilivyo kuhakikisha msimu ujao wanakuwa moto zaidi.
Ili kutimiza malengo yao hayo, klabu hiyo imeshamalizana na wachezaji wake wote wa zamani waliopo katika mpango wa Aussems, huku ikiwa imeanza kusajili wapya, wazawa na wa kigeni.
