Msemaji wa Simba Haji Manara amesema usajili wa timu hiyo unaofanywa sasa unazingatia zaidi michuano ya ligi ya mabingwa kwani anaamini kwa hapa nyumbani wana uhakika wa kutwaa ubingwa
Katika utaratibu wao wa kutambulisha wachezaji wapya, jana Simba ilimtambulisha mshambuliaji kutoka Brazil Wilker Henrique da Silva aliyesaini mkataba wa miaka miwili
Baada ya utambulisho huo Manara alitamba kuwa usajili huo umelenga zaidi michuano ya CAF
"Wakati wenzetu wakisajili kwa kutaka kushindana na sisi, tumeshatoka huko.. sisi tunatengeneza timu imara ambayo itapambana na timu vigogo wa Afrika," amesema Manara
"Kazi ndio imeanza, Jumatatu tutaendelea na zoezi la kutambulisha wachezaji wapya"
Da Silva anakuwa mchezaji wa pili wa kigeni kusajiliwa na Simba ambayo juzi ilimtambulisha kiungo kutoka Sudani Sharaf Elden Shiboub 'Master'
