Patrick Gakumba ambaye ni wakala wa mshambuliaji hatari wa Simba Meddie Kagere, amesema taarifa zinazosambaa mitandaoni kuwa mteja wake amemalizana na Zamaleki ya Misri hazina ukweli wowote
Gakumba amesisitiza kuwa Kagere bado ana mkataba na Simba hivyo hawezi kufanya mazungumzo na timu nyingine bila ya ruhusa ya uongozi wa timu hiyo
"Mimi sina tamaa ya pesa, nilisema Kagere anamilikiwa na Simba wao ndio wenye mamlaka na mchezaji wao sasa mimi nitamuuzaje?," amehoji Gakumba
Gakumba amesema Kagere kwa sasa yuko mapumziko kwao nchini Rwanda na ametaka asihusishwe na taarifa zisizo na ukweli wala uthibitisho wowote
Jana kwenye mitandao ya kijamii zilisambaa taarifa kuwa Kagere amefikia makubaliano binafsi ya Zamaleki na timu hiyo kutoka Misri iko tayari kutoa Bilioni 1.2 kumsajili inara huyo wa mabao msimu uliomalizika ligi kuu ya Tanzania Bara
