Jana anayejiita mdhamini wa klabu ya Simba Mzee Hamisi Kilomoni alihudhuria tukio la kuchangishana la Yanga lililofanyika ukumbi wa Diamond Jubilee jijini Dar es salaam
Kilomoni ambaye hivi karibuni ameingia kwenye mgogoro na Simba akidaiwa kukwamisha mchakato wa mabadiliko kutokana na kuzuia baadhi ya nyaraka ambazo zinahitajika na mwekezaji wa Simba Mohammed Dewji 'Mo', amesema alihudhuria hafla hiyo ikiwa sehemu ya kudumisha ushirikiano baina ya Simba na Yanga
Amesema kuonekana kwake ukumbini na watu wa Yanga haimaanishi kuwa amehamia huko
" Mimi ni mdhamini wa Simba na muasisi wa mambo mbalimbali katika klabu hii, Kufika hapa haimaanishi nimehamia Yanga," alisema
"Ngoja niwaambie zamani Yanga na Simba tulishirikiana katika kila jambo upinzani wetu ni uwanjani sio kama sasa vijana wa leo mnaleta uadui
"Ilikuwa kama akifariki shabiki wa Yanga basi mashabiki wa Simba ndio watakaomzika hivyo hivyo akifariki shabiki wa Simba pia Yanga watamzika, haiwezi kuwa busara ndugu zangu wakawa na shughuli hapa hapa Dar nami nisiweze kufika"
Baada ya kuonekana ukumbini na watu wa Yanga jana, wengi wamemtuhumu kuwa huenda akawa anatumiwa na baadhi ya watu kuivuruga Simba
Mzee Kilomoni ambaye alinusurika kufutiwa uanachama kwenye Mkutano Mkuu uliopita, kwa mgogoro anaojaribu kuutengeneza, huenda akafutiwa uanachama wake
