Mtendaji Mkuu wa Simba Crescentius Magori amesema klabu hiyo imeteua wajumbe wanne ambao watasimamia na kukamilisha mchakato wa mabadiliko kwa vipengele vichache vilivyobaki
Akizungumza na waandishi wa habari leo Hotel ya Serena jijini Dar es salaam, Magori amewataja wajumbe hao ni Aziz Kivile, Mulamu Ng'ambi, Babra Gonzalez na Wanasheria wa Simba
Magori amesema wajumbe hao watafanya kazi usiku na mchana kuhakikisha mchakato unakamilika ndani ya mwezi mmoja
Azungumzia usajili
Magori amesema jana Bodi ya Simba ilipokea ripoti ya Kamati ya Usajili ambapo amesema baadhi ya wachezaji wataachwa na wengine watatolewa kwa mkopo
Usajili wa wachezaji ambao walimaliza mikataba tayari umekamilika huku timu hiyo pia ikiwa tayari imewasajili wachezaji wapya wa ndani
Kuhusu wachezaji wa Kimataifa, Magori amesema zoezi hilo litafanyika katika siku kumi zijazo
Magori amesema wachezaji wa Kimataifa watakaosajiliwa watakuwa bora zaidi ya wale ambao wataachwa na timu hiyo
Aidha amesema orodha ya wachezaji ambao wataachwa au kutolewa kwa mkopo itatolewa baada ya kufanya nao majadiliano
Amesema wataendelea na utaratibu wa kutambulisha mchezaji mmoja mmoja aliyesaini mkataba wa kuitumikia Simba kupitia kurasa maalum za Simba kwenye mitandao ya kijamii
Amkaanga Mzee Kilomoni
Magori amesema Mzee Kilomoni sio Mdhamini wa klabu ya Simba.
Aidha amesema baada ya yeye kukataa kutoa hati ya majengo, Simba ilifanya utaratibu wa kupata hati nyingine
Hivyo hati hiyo inayoshikiliwa na Mzee Kilomoni haiwezi kuzuia mabadiliko yanayofanywa na klabu hiyo
"Hiyo hati iliyoshikiliwa haiwezi kuzuia mabadiliko ndani ya Simba… Hawa wazee siyo walioianzisha Simba, walioianzisha walishakufa, na wao watakufa, na hata sisi tutakufa, watakuja wengine"
