Jana mashabiki wa Simba waliojitokeza uwanja wa Taifa kushuhudia 'mnyama' akikabidhiwa kombe baada ya kutwaa ubingwa wa ligi kuu, hawakufurahia kuahirishwa kwa hafla hiyo
Licha ya mvua kunyesha, baadhi ya mashabiki walikubali 'kulowana' ili mradi tu washuhudie tukio hilo la kihistoria
Hata hivyo Bodi ya ligi iliahirisha hafla hiyo baada ya mgeni rasmi, Waziri wa Mambo ya Ndani Mh Kangi Lugola kupata udhuru
Mtendaji wa Bodi ya Ligi Boniface Wambura alisema sherehe hizo zimehamishiwa mkoani Morogoro, zitafanyika baada ya mchezo dhidi ya Mtibwa Sugar utakaopigwa keshokutwa Jumanne katika uwanja wa Jamhuri
Akingumza baada ya mchezo dhidi ya Biashara United uliomalizika kwa sare ya bao 1-1, nahodha wa Simba John Bocco aliwashukuru mashabiki waliojitokeza uwanja wa Taifa kuwaunga mkono licha ya hali ya mvua
cutAmewataka mashabiki hao kuungana na wale wa mkoani Morogoro katika sherehe za ubingwa keshokutwa
Aidha Bocco amewashukuru mashabiki kwa kuwa sehemu ya mafanikio ya timu hiyo msimu huu
"Kuna wakati tulipoteza mechi, lakini hawakuisusa timu yao, hivyo tulishikamana nao nyakati zote, wanastahili pongezi zote," alisema
"Kulikuwa na viporo vingi, tulicheza mechi nyingi ukichanganya na za kimataifa, lakini tunashukuru tumefikia lengo la ubingwa"
