Mshambuliaji wa Kimataifa wa Simba Emmanuel Okwi jana alifunga mabao matatu sawa na Meddie Kagere na kuisaidia Simba kupata ushindi mnono wa mabao 8-1 dhidi ya Coastal Union
Hiyo ilikuwa hat-trik ya pili kwa Okwi msimu huu
Kwa siku za karibuni Okwi amekuwa katika kiwango bora cha kuzifumania nyavu, kwa wastani akifunga karibu kila mchezo
Okwi aliuanza msimu kwa kasi akifanikiwa kufunga mabao saba katika michezo ya mwanzoni mwa msimu
Hata hivyo baadae alijikuta akishindwa kuzifumania nyavu kwa karibu miezi mitatu hali iliyopelekea wakosoaji wake kupata la kuzungumza
Lakini tangu Simba iondoshwe hatua ya robo fainali ya michuano ya ligi ya mabingwa barani Afrika, Okwi amezaliwa upya na amekuwa akitupia mabao nyavuni kila anapojisikia
Okwi amefichua kilichomsaidia ni uvumilivu na ushirikiano anaoendelea kupata kutoka kwa wachezaji wenzake
"Wakati nilipokuwa sifungi sikukata tamaa, nilijua ni kipindi cha muda tu ambacho kitapita" amesema Okwi
"Wenzangu waliendelea kunipa moyo na kunihamasisha nijitume zaidi"
"Lakini jambo jema ni kuwa Simba haitegemei mchezaji mmoja. Kila anayepata nafasi anaweza kufunga ndio maana mimi nsipofunga wapo wengine watafunga, tunacheza kwa kushirikiana"
