Uongozi wa Klabu ya Simba ya jijini Dar es Salaam, umesema kuwa wanarejea kutumia kampeni yao ya 'Do or Die' ambayo waliitumia katika mechi za mashindano ya kimataifa za Ligi ya Mabingwa Afrika sasa imehamia kwenye Ligi Kuu Tanzania Bara kwa ajili ya kusaka pointi 15
Mabingwa hao watetezi wenye pointi 78 baada ya kucheza mechi 30, wamebakiza michezo nane ili kumaliza msimu huu wa Ligi Kuu Tanzania Bara mwaka 2018/19 wakati vinara wa ligi hiyo, Yanga ambao wana pointi 80 wamebakiza michezo minne.
Endapo Simba itapata ushindi wa mechi tano kati ya hizo zilizosalia, itafikisha pointi 93 ambazo haziwezi kufikiwa na timu nyingine yoyote inayoshiriki ligi hiyo msimu huu, wakati Yanga ikishinda michezo yake yote iliyosalia itafikisha pointi 92.
Akizungumza jana jijini, Mkuu wa Idara ya Habari na Mawasiliano wa Simba, Haji Manara, alisema kuwa lengo la kutumia kampeni hiyo ni kuhakikisha wanavuna pointi hizo na kutetea ubingwa wa ligi hiyo ambao bado wanaushikilia.
Manara alisema kuwa ili waweze kutimiza malengo hayo, wanahitaji mashabiki wa timu hiyo wajitokeze kuishangilia timu yao kama walivyofanya katika michezo ya kimataifa ambayo walishiriki msimu huu.
"Tuna mechi tano mfululizo Dar es Salaam, pointi 15 za Dar es Salaam ni lazima tuzichukue, mikoani kuanzia Mwanza, Musoma, wametuunga mkono sana, mara nyingi sisi tumekuwa tukiujaza uwanja katika mechi za kimataifa, kampeni yetu ni kuhakikisha tunajitokeza kwa wingi, tunawaomba Wana-Simba wajitokeze kwa wingi, katika mechi tano, tuanze Jumatano, kama tunaweza kuujaza Uwanja wa Taifa, hatushindwi kwenye Uwanja wa Uhuru ambao unaingiza watu 15,000 hadi 20,000. Tunahitaji tushinde, wala hatutajali matokeo ya Yanga," alisema Manara
Kiongozi huyo aliongeza kuwa kikosi chao kimerejea salama kutoka Mbeya na kitaanza mazoezi leo kwa ajili ya kuikaribisha Coastal Union kutoka jijini Tanga kwenye mchezo mwingine wa Ligi Kuu Bara utakaochezwa kesho.
Mechi nyingine zitakazofuata za Simba za ligi hiyo inayotoa mwakilishi wa Tanzania Bara katika mashindano ya kimataifa ya Ligi ya Mabingwa Afrika, ni dhidi ya Kagera Sugar itakayocheza Ijumaa, Azam FC (Mei 13), Mtibwa Sugar (Mei 16) na dhidi ya Ndanda FC kutoka Mtwara itakayochezwa Mei 19 mwaka huu, zote kwenye Uwanja wa Uhuru.
Simba ambayo msimu huu ilifika hatua ya robo fainali ya Ligi ya Mabingwa Afrika na kutolewa na TP Mazembe ya Jamhuri ya Kidemokrasia ya Congo (DRC), itacheza mechi ya kirafiki ya kimataifa dhidi ya Sevilla ya Hispania na itafunga pazia la Ligi Kuu kwenye Uwanja wa Jamhuri Morogoro kwa kuvaana na wenyeji, Mtibwa Sugar.
Kwa hisani ya Nipashe
