Kocha Mkuu wa Simba Patrick Aussems kesho atakiongoza kikosi chake kuikabili Alliance Fc katika mchezo wa ligi kuu ya Tanzania Bara utakaopigwa uwanja wa CCM Kirumba
Simba iliwasili jana jijini Mwanza na jioni ikafanya mazoezi. Leo inatarajiwa kujifua dimba la CCM Kirumba
Baada ya kupoteza mchezo uliopita dhidi ya Kagera Sugar kwa kufungwa mabao 2-1, Simba haipaswi kupoteza alama zaidi. Matokeo ya ushindi ni muhimu kwa mabingwa hao watetezi
Mchezo mbovu ulioonyeshwa kwenye kipindi cha kwanza dhidi ya Kagera Sugar ndio ulioigharimu Simba, makosa hayo hayapaswi kurudiwa katika mchezo wa kesho
Aussems amesema wachezaji wake wanapaswa kucheza dakika 90 na sio dakika 45 kama walivyofanya mkoani Kagera juzi
Aidha Alliance Fc ya sasa sio ile ya mzunguuko wa kwanza ambayo Simba iliifumua mabao 5-0 katika mchezo uliopigwa uwanja wa Taifa
Matokeo ya mchezo wa kwanza yasiwafanye wachezaji wa Simba 'wakawachukulia poa' wapinzani wao hao ambao wanashika nafasi ya 17 kwenye msimamo wa ligi wakiwa wamejikusanyia alama 37
Kama ilivyokuwa kwa Kagera Sugar, timu ya Alliance Fc nayo iko katika vita ya kujinusuru isiteremke daraja
Watacheza kwa 'jihadi' kujaribu kupata matokeo hivyo ni mchezo ambao wachezaji wa Simba nao lazima wajitoe kwa dakika zote za mchezo ili kuondoka na alama tatu muhimu
