Mtoto Rakeem Sango maarufu kama Rakeem Kagere amekuwa shabiki maarufu sana wa Simba ambapo tangu aibuliwe kutoka Tanga amekuwa akiripotiwa sana na vyombo vya habari
Juzi wakati kikosi cha Simba kikiwa mkoani Tanga kupepetana na Coastal Union, msemaji wa klabu ya Simba Haji Manara alimtembelea mtoto huyo anayeishi Mikanjuni mjini Tanga
Manara ndiye aliyefanikisha kutambulika kwa Rakeem baada ya video iliyokuwa ikimuonyesha akilia baada ya Simba kufungwa kusambaa kwenye mitandao ya kijamii
Bosi huyo wa kitengo cha habari Simba, aliwezesha Rakeem kusafiri jijini Dar es salaam na Mama yake kushuhudia mchezo wa ligi ya mabingwa dhidi ya AS Vita
Juzi baada ya kukutana tena na Rakeem, Manara alimtaka azingatie sana elimu ili baadae aje kuwa kiongozi wa klabu ya Simba
Aidha Manara amesema safari yake hiyo ni moja ya mikakati ya kuitangaza Simba
Manara amebainisha kuwa wana mkakati wa miaka 10 ambapo katika kipindi hicho watahakikisha asilimia kubwa ya Watanzania wanaiunga mkono Simba
