Beki wa kati wa kimataifa wa Simba, Paschal Wawa, anatarajia kuanza mazoezi mepesi Jumatatu baada ya maumivu ya misuli aliyokuwa nayo kupona, imeelezwa.
Kutokana na maumivu hayo, Wawa ambaye amekuwa katika kikosi cha kwanza cha mabingwa hao watetezi wa Ligi Kuu Tanzania Bara, Simba aliukosa mchezo wa marudiano uliochezwa mjini Lubumbashi na pia jana dhidi ya Coastal Union kwenye Uwanja wa Mkwakwani jijini hapa.
Meneja wa Simba, Patrick Rweyemamu, ameliambia Nipashe kuwa hali ya beki huyo imeimarika baada ya kupumzika katika muda aliopewa na daktari wao.
Rweyemamu alisema pia beki wao mwingine, Juurko Murshid na kiungo James Kotei wanaendelea vema, lakini hana uhakika kama watajumuishwa katika safari ya kuelekea mikoa ya Kanda ya Ziwa.
"Kocha Mkuu (Patrick Aussems) ndiye ataamua kama wote tutakwenda Kanda ya Ziwa, lakini ni baada ya kupata majibu kutoka kwa daktari wa timu kuhusu maendeleo yao," alisema meneja huyo
Baada ya mechi ya jana, Simba inarejea jijini Dar es Salaam kuanza kujiandaa na safari ya kuifuata Kagera Sugar ambao watakutana Jumamosi kwenye Uwanja wa Kaitaba mkoani Kagera.
