Kikosi cha mabingwa watetezi ligi kuu ya Tanzania Bara, Simba kiko mkoani Tanga ambapo kesho kitashuka kwenye uwanja wa Mkwakwani kuikabili Coastal Union katika moja ya michezo ya viporo
Simba iliwasili jijini Tanga jana mchana na jioni ikafanya mazoezi kujiandaa na mchezo huo. Leo jioni itajifua katika uwanja wa Mkwakwani
Meneja wa Simba Patrick Rweyemamu amesema wachezaji wote waliosafiri mkoani Tanga wako katika hali nzuri tayari kwa mchezo huo
Aidha Rweyemamu amesema nyota watatu wataukosa mchezo wa kesho kutokana na majeruhi
Mlinzi Juuko Murshid na kiungo James Kotei wanaungana nabeki Paschal Wawa baada ya kupata majeraha kwenye mchezo uliopita dhidi ya TP Mazembe
Simba inakabiliwa na ratiba ngumu ya 'kula viporo' ikilazimikia kucheza kila baada ya siku mbili au tatu
Kocha Mkuu wa mabingwa hao watetezi Patrick Aussems amesema ratiba hiyo sio rafiki kwa timu yake lakini hakuna namna ni lazima wacheze na wanahitaji kushinda michezo yote ili waweze kutetea ubingwa
Aussems amesema Simba ina kikosi cha wachezaji 30 hivyo watakabiliana na ratiba hiyo
