Kocha Mkuu wa Simba Patrick Aussems amesema hatua waliyofika msimu huu katika michuano ya ligi ya mabingwa barani Afrika sio haba na mashabiki wa timu hiyo wana kila sababu ya kutembea kifua mbele
Simba imetolewa hatua ya robo fainali ya michuano hiyo juzi kwa kufungwa mabao 4-1 na TP Mazembe
Hata hivyo kufika hatua hiyo ni mafanikio makubwa kwa Simba ambayo ilijiwekea malengo ya kutinga angalau hatua ya makundi
Aussema amesema walipoteza mchezo dhidi ya TP Mazembe kwa kuwa wapinzani wao walijipanga na kupeleka mashambulizi ya mara kwa mara langoni kwao na hatimaye walifanikiwa kurejesha bao walilofunga mapema na kufunga mengine matatu ambayo yaliwakatisha tamaa wachezaji wake.
"Haikuwa mipango yetu, lakini tulistahili kusonga mbele, kwangu kuingia hatua ya nane bora ilikuwa nafasi kubwa sana na wote tulikuwa na nafasi sawa, ila uzoefu na ubora wa vikosi vyetu ndio umechangia matokeo haya, naamini msimu ujao tutakuwa imara na bora zaidi," alisema Aussems.
Mbelgiji huyo amesema sasa wanaelekeza nguvu zao kwenye ligi kuu kuhakikisha wanatetea ubingwa ili kupata nafasi ya kshiriki michuano hiyo mwakani.
Simba imeelekea mkoani Tanga ambapo keshokutwa Jumatano itaivaa Coastal Union
