Mo ameahidi makubwa Simba

Baada ya kushinda Zabuni ya uendeshaji wa klabu ya Simba, Mfanyabishara Mohammed Dewji amesema anakusudia kufanya mapinduzi katika uwendeshaji wa klabu hiyo kuifanya kuwa klabu tajiri zaidi katika ukanda wa Afrika Mashariki na Kati.

Mo alitangazwa kushinda zabuni ya uendeshaji wa klabu ya Simba jana kwenye Mkutano Mkuu wa klabu hiyo uliofanyika katika ukumbi wa Kimataifa wa Mwalimu Julius Nyerere jijini Dar es salaam.

Baada ya kutangazwa, MO ametoa ahadi ya kujenga viwanja viwili ndani ya muda mfupi na akasisitiza, usajili watakaoufanya kila mwaka, hautapungua kiasi cha Sh. 1 bil.

Akitoa ahadi hiyo katika hotuba yake ya shukrani baada ya kutangazwa kama mshindi wa zabuni na Jaji Mstaafu wa Mahakama Kuu, Thomas Mihayo, Mo alisema ni aibu kwa Simba kutokuwa na uwanja wake wa mazoezi na mechi.

"Nitahakikisha Simba inakuwa na uwanja wenye nyasi za asili lakini pia nitajenga uwanja mwingine wenye nyasi bandia," alisema Mo.

Katika hatua nyingine, Mo alitoa angalizo kwa wachezaji wa timu hiyo kujituma huku akiahidi fungu kubwa la fedha katika bajeti ya usajili.

"Wachezaji wa Simba ni lazima watambue thamani ya jezi ya hii klabu hivyo wanapaswa kujituma. Pia nitahakikisha kiasi kidogo cha fedha ambazo tutakuwa tunazitumia kwenye usajili ni Sh. 1 bil," aliongeza Mo