Mshambuliaji Meddie Kagere ametimiza mabao 14 yanayozidi kumweka kwenye nafasi nzuri ya kufukuzana na Salim Aiyee anayeongoza chati ya ufungaji wakati Simba ikichapa Mbao kwa magoli 3-0 kwenye Uwanja wa Jamhuri, Morogoro.
Kabla ya bao hilo ambalo Kagere alilifunga mnamo dakika ya 79 kwa mkwaju wa penalti, mshambuliaji huyo alikuwa amepachika mabao 13 ambayo yalikuwa ni matatu nyuma ya yale ya Aiyee wa Mwadui mwenye mabao 16 kwa sasa.
Penalti hiyo Kagere alipiga kwa ustadi mkubwa akimpoteza kipa kwa kukimbia na kusita kabla kupiga jambo lililomwacha kipa wa Mbao akiruka upande tofauti na mpira ulipoingia.
Penalti hiyo ilitokana na faulo ya beki Amimu Abdulkarim kumuangusha mshambuliaji huyo ndani ya eneo la hatari la Mbao FC.
Bao hilo la Kagere lilikuwa ni kama sukari inayopakwa juu ya keki kwani tayari Simba ilikuwa imeshajihakikishia ushindi kupitia mabao mawili ya nahodha wao John Bocco.
